Të mëdhenjtë e Evropës, të gjithë në garë për Behramin

Valon Behrami, nga "njeriu i derbit" në objektivin e klubeve të mëdha evropiane në merkato. E pëlqen Sevilja, interesohen Barcelona e Mançester Junajted


Valon Behrami vazhdon të jetë protagonist në Serinë A italiane: pas golit të fitores 3-2 që Lacio arriti në sfidën me Romën, për 23-vjeçarin janë rikthyer zërat e merkatos. Mesfushori, i cili refuzoi kombëtaren shqiptare për t‘u përfaqësuar me Zvicrën (kjo i lejon të cilësohet si komunitar) pëlqehet nga Sevilja. Përveç andaluzëve, interes për Behramin kanë shfaqur edhe dy klube më të mëdha në kontinent, Barcelona dhe Mançester Junajted. Lojtari është nën kontratë me bardhekaltërit deri në vitin 2010, e tashmë klubi duhet të bëjë gjithçka për ta bindur që të qëndrojë në kryeqytetin italian. Në fakt, në fillim të këtij muaji, presidenti i Lacios, Lotito, duke njohur interesimin e shumë skuadrave të huaja është takuar me menaxherin e futbollistit, Alesandro Beltrami, për të gjetur bazat e rinovimit të kontratës, por sipas raportimeve, palët janë ende shumë larg.